KERJA TAHUN, KAI RAS UGA?

Betlehem Ketaren, SAN DAMIANO
Kesemalen (adat) siadi e me sada kinibayaken kegeluhenta. Kesemalen siadi e turah dingen nggeluh mehumur i kuta sue ras biak ingan bage pe biak jelma si nggeluhkensa. Lit kesemalen siadi si masap erkiteken itadingken perkembangen jaman, tapi lit ka si tetap nggeluh, igeluhken manusia alu isesuaiken ras endek kegeluhen.
Kerja Tahun e me sada kesemalen siadi ibas kalak Karo, si tetap ertahan nggeluh seh genduari, gia ibas pendalankenna maun enggo lain ras si mula tangtangna.

Kai ras uga kin kerja tahun e ibas paksa siadi?

Ibas paksa siadi, ras banci ikataken seh asa genduari kegeluhen kalak Karo erpalasken pendahin nuan-nuan ku juma ras ku sabah. Janah terlebih-lebih page me sinuan-sinuan si pematang ibas paksa siadi.
Lit pe pertoton kalak Karo si semal denga sibegi, nina: mbuah page nisuan, merih manuk niasuh, sai mara, kurumah tendi. Ije tangkas teridah maka page igeluhken kalak siadi jadi tanda kesangapen, ketuahen ras kemalemen ate. Page e me tanda kegeluhen, maka nai galang kitikna keben ingan page jadi sukaten kiniliten.
Rikutken ras kiniteken kalak Karo siadi, kesangapen, ketuahen ras kemalemen ate (si man perayaken nggeluh kalak Karo) banci ialoken arah pemasu-masun si erkuasa raduken ras pengayun pertendin sangkep nggeluh kerina. Page si jadi tanda kegeluhen e itotoken janah ipepulung janah itenahken pe sangkep nggeluh gelah ras-ras man entabeh alu arapen, ngayu pe pertendinna kerina gelah mbuah page tahun enda.
Kepulungen sangkep nggeluh e ibas tep-tep kuta, raduken ras keriahen si ilakoken singuda-nguda anak perana bage pe si medanak si igelari guro-guro aron si ilakoken tep-tep tahunna, e me kerja tahun.
Kerja tahun e, sue ras antusenna e, lit piga-piga erbage rikutken ras pendalanken ibas pelain-lain kuta bage pe urungna, bagenda:
1. Merdang Merdem. Rikut ras gelarna, merdang e me kap dahin ibenaken alu ngerabi, nikapken ingan nuan, nemai ras nuan. Kerja tahun ngikutken paksa merdang idalanken i Tigabinanga ras sekelewetna bage pe Munte ras sekelewetna.

2. Nimpa Bunga Benih (Ngambur-ngamburi). Kerja tahun ibahan tupung page paksa erlayuk (ersusun kulpah) tah pe tupung umur page kurang lebih dua bulan. Si e ialakoken i taneh Sepulu Dua Kuta bage pe i Simpang Empat ras sekelewetna.

3. Mahpah. Kerja tahun ilakoken lako ngenanami buah page si nangdangi rani (mulai kenca megersing). Kerja tahun si rikutken mahpah ilakoken i Barusjahe, Tiga Panah ras sekelewetna.

4. Ngerires. Kerja tahun ilakoken kenca dung peranin guna erkata bujur ibas ulih peranin e. Kerja tahun rikutken ngerires ilakoken i Batu Karang ras kuta-kuta i sekelewetna.

Adi nai, rikutken ras kiniteken si pemena (siadi), pertoton tahpe bilang-bilang kerja tahun itujuken terutama man si Beru Dayang. Beru Dayang (bandingken ras Dewi Sri i Jawa tah pe Dewi Maia i Junani) e me si mada kerina bertin (maharahim) janah si mere pasu-pasu guna kerina kinihumuren, subuk gelah taneh mehumur gelah mbuah page, bertin diberu “mehumur” gelah ertuah bayak bage pe bertin asuh-asuhen ras rubia-rubia ras binurung mehumur gelah merih kerinana.

“Biasana belo icibalken rikutken ras pengala erbilang: “Mbuah ko page tahun enda, mbuah ko page. Merih ko masuk niasuh, sai mara, ku rumah ko tendi” ku Deleng Sibuaten. Kenca bage, bagi sinikataken nande aron, merkat me aron ngambur-ngamburi pulungen bulung simalem-malem ras kersik, mulai i pusung juma jenari ku tep-tep suki juma”, nina Sampaten Ketaren (Bp. Agen), sekalak tua-tua rikutken ras pengingetna uga lakon Ngambur-ngamburi ilakoken tupung kerja tahun i kuta Raya.
“Engkai maka ku Deleng Sibuaten?”, ningku nungkun. “Bage ka nina tua-tua, tentu bage ka iikutken. Banci jadi ije me niakap si Beru Dayang ringan tah pe maun ban gelar deleng e sentudu ras biak kehumuren. Ma kin arah sibuaten (perjabun) maka lit kinimerihen?”, nina Bp. Agen erjabap.
Bagi paksa-paksa kerja tahun si pelain-lain e, torosen ras perkakas perlengkapen si nibaba ku juma mungkin pelain-lain. Anem bage, torosen kerja tahun si kuhna si semal denga iinget asa genduari, e me kap:

1. Wari si pemena: Cikur-kur. E me wari persikapen merdang merdem alu ngkurkuri taneh lako ndarami kalimpenek, kidu, ridap tah pe kerina si biak pangan si nggeluh i taneh guna jadi adum nakan pangan pemenan kerja tahun.

2. Wari si peduaken: Cikurung. Nerusken kai si idalanken ibas wari si pemena, idarami me kurung i reba, i juma tah pe i sabah guna ijadiken adum nakan pangan ibas nerusken persikapen kerja tahun.

3. Wari si peteluken: Ndurung. E me wari persikapen kerja tahun si peteluwariken, si ilakoken arah mburtas sabah tah pe ngkerahi lau anak guna muat nurung emas, sibakut, itik, kaperas, gayo tah pe belut lako jadi adum nakan pangan.

4. Wari si peempatken: Mantem. E me lakon nangdangi tampuk kerja tahun si idalanken alu motong lembu, kerbo, babi jadi pangan tupung mantem bage pe ibas mata kerja tahun.

5. Wari si pelimaken: Mata Kerja Tahun. E me wari si mbelin ngerayaken kerja tahun. Ibenaken alu naruhken pangan si enggo tasak tah pe page mbaru ku rumah kalimbubu ras nimai kade-kade ras temue si reh ku kumah. Kerina rumah talang ras pantang itutup. Tep-tep rumah itingkah, peraturenna arus man. Gelah reh riahna kuta e, biasana ibahan pe gendang guro-guro aron i jambur, e me ingan singuda-nguda ras anak perana ncidahken dirina ras sura-surana arah ercakap-cakap sapih-sapih ia, landek ras impalna, bage pe arah pengarak-ngarak si medanak erlajar me ia kerina kerna kesemalen-kesemalen adat.

6. Wari si peenemken: Nimpa. Gia melala erbagena cimpa, cimpa kerja tahun biasana e me kap cimpa unung-unung e me cimpa si iban ibas tepung pulut ras tepung beras biasa si risiken gula merah ras tualah ibaluti alu bulung singkut. Cimpa banci ipan sope man tah pe kenca man bage pe biasa ka jadi luah mulih kerja tahun. Enngo ndekah jadi ibas melala kuta, lakon nimpa ipersada ras lakon mata kerja tahun.

7. Wari si pepituken: Rebu. E me tutup kerja tahun. Tupung temue enggo mulih ku kutana sekalak-sekalak si tading i kuta si erkerja tahun la banci kujuma tah pe ku sabah.Tep-tep ibas jabu pulung me orangtua ras anak-anakna guna pekesahken bage pe lako pepanken ku ukur ras pusuh kerna kerina si enggo inanami ibas segedang-gedang wari perayan kerja tahun. Rebu ertina la banci singerana-ngerana janah mereken kesempaten man rubia-rubia ras kerina si nasa lit pesikap bana kerina (pediat alam mengharmoniskan dirinya)

Kerja Tahun si genduari

Gia enggo melala perubahen-perubahen, seh asa genduari kerja tahun tetap denga idalanken. Merari genduari kerja tahun ilakoken ibas dua wari: Motong ras Matana. Bage me gendang guro-guro aron semal denga ibahan sada berngi sada wari, mulai ibas berngi motong seh ku mata kerja tahun.
Adi semalna kerja tahun nai ibahan serentah ibas sada urung rah pe rarasen-rarasen kuta janah mata kerja tahun biasana rembang bas wari Cukera Dudu, genduari enda ibas bulan-bulan rikutken kesemalen siadi, wari-warina pelain tep-tep kuta sue ras perarihen ras perkolong-kolong tah pe kesadan arih ibas Karang Taruna ibas kuta.
I kuta-kuta si ndeher ku tiga, maun-maun lanai lit lakon morong bas wari mantem, tapi keperlun-keperlun itukur i tiga. Tep-tep rumah tetap talang tupung mata kerja tahun, si mada jabu ertima temue, tapi jarang ertenah maka mungkin pe jadi nimai si la mungkin reh.
Lanai lit lakon ngambur-ngamburi tah pe lakon ngamati Beru Dayang sabap nina maka kita kerina enggo ragama.
E maka kai antusen kin kerja tahun genduari enda? Sungkun cuba anak-anakta. Ula heran adi nina erjabap hiburen ras man gratis!
Adi bage ikatakenna maka melala mesi enggo bene kai si meherga si ndube siajarken nini-nininta. Terlebih-lebih ibas kai ndai si ituriken idatas kerna antusen kerja tahun eme: ertoto, man ras-ras sangkep nggeluh bage pe keriahen si medanak ras singuda-nguda anak perana.
Mungkin nge kerja tahun e iubungken ras missa peranin? Tentu banci man kuta-kuta si erbahan kerja tahun dung kenca kerja tahun. Mungkin nge kerja tahun iubungken ras ngamati St. Maria? Tentu banci man stasi-stasi si rembang kerja tahun kutana ibas bulan Oktober. (Sabap la lit kerja tahun ibas bulan Mei), tapi uga si kerja tahun ibas bulan enem tah bulan pitu tah pe si ngubungken kerja tahunna ras wari kemerdekan (Juhar bage pe Kidupen).

E maka adi kin ateta ngubungken kerja tahun ras pendahin Gereja tentu perlu denga penggermeten si mbages. Saja peluang si lit, kerja tahun genduari enda menam-menam enggo kebenen erti ertoto, si tentu perlu iisi ras irayaken alu perayan kiniteken Gereja. (BK)

 

Salam : Kesain Rumah Derpih

Share:

Selengkapnya