Anding - Andingen Kalak Karo

Mejuah juah man kerina si reh ku bas blog enda, ijenda kutulisken piga piga anding – andingen karo man banta kerina, mbera mbera nambah ilmu dingen wawasen man banta kerina.

Erbuat bengket bagi tutup abal-abal.

Pendahin sinilakoken tambah beratna. Atena erdahin guna muat penukur beras, tapi kenca erdahin maka erbuena utang.

Kelaling-kelaling bagi bunga abang-abang.

Biasana iandingken kempak jelma si la erturi-turin pecibal geluhna, la lit teman entah kadé-kadé si mediate man bana.

Ajari bancina.

Ibas kinigeluhen sinidalani, uga lit na, bagem i baba. Erti kata i pala palai asa ngasupta.

Siagengen radu mbiring, sikuningen radu megersing

Radu radu erbahan si la mehuli ( balas dendam ), duana nge rate mesui. Adi radu radu nampati ( sikeleng – kelengen ), duana ka ngenanami kemalemen.

Adi ngalo la rido, nggalar nge la rutang.

Adi harta reh arah dalan si la mehuli, tangkel ka nge kedungen na utang ibas kinibujurenta.

Ngkimbangi amak babo lubang

i andingken man jelma si tempas perbahanenna mehuli, tapi meneken kepe ukurna.

Bagi angguk-angguk pudi terang, iluh mambur la lit si ngapul

Kalak si ngandung tangis nandangi terang wari nupung kepatén, lanai lit si ngapulisa, erkiteken enggo munduk unduk kerina ras tunduh.( ibas kesusahen, lalit sinampatisa erkiteken kalak la ngsup, deba la meteh).

Bagi ancit, adi ersada rubat, adi sirang sidaramen, émaka inganna jumpa bas gebuk api

Andingenna, jelma jabu sirusur pejentik, rusur rubati adi ersada, tapi adi sirang sitedehen.

Bas lau nari gara api

Siarusna dahinna mereken purpur sage ntah pe kedamen, tapi ia si erbahan perubaten.

Adi pajek gara api, kugapa pé rubati.

Adi lalit siman tanggeren, tentu pajek pergara api dalikan, ndehara ras perbulangen banci rubat, perbahan beltek enggo melihe, lalit si man panganen.

Ngutkut bagi api bas segal.

Ikatakén kujelma si permenek, nggit ngerem-ngerem ukurna. Aténa segat entah morah-morahna ibuni-bunikenna. Seh mawen-mawen dagingna kertang itindan-tindan ukurna.

Keri-keri arang besi la tembé.

Pendahin si ngkeriken gegeh, tapi sura sura la seh. Umpamana nekolahken anak, sekai pe biaya sekolah iusahaken amin gia erdaya juma, juma enggo terdaya, tapi sekolah si anak la seh.

Aras jadi namo

Kalak si mesera ndube baban geluhna, gundari nggo jadi kalak bayak janah mehaga.

Ngasuhi anak arimo, jukut nakanna.

Nai, jukut shekel mergana, jadi iandingken man sekalak jelma si la terasuhi. Adi si usur usur, piah kita i pan na.

Bagina arimo natap tabé.

Adi arimo ercurmin bas lau, megah akapna ngenehen rupana, seh maka lupa ia ndarami nakan. Ikuanken man jelma si labo entabeh babanna nggeluh, tapi la aténa erdahin, perbahan joré akapna bana.

Bagi aringgené beru-beru

Adi aringgene beru beru, la neren. Iandingken kujelma si la perpang, sitik pé kalak la mehangké. Biasa ikataken man anak perana, si la ibiari singuda-nguda sabap ngkuit pé la pang.

Labo terbuat até tungir asa pungga.

Pemindon si kitik pe la terpeseh, apai ka pemindon si mbelin?

Biasana ikuanken man anak anak ngandung mindo si la tertukur contohna nukur kapal terbang, kuda, motor, ras sidebanna.

Gerantang acih

Ngataken jelma pergerantang, mehantu tempa, tapi situhuna ia percikcik.

Menang bas babah, talu bas perukuren

Ikuanken kukalak si la lit pemetehna, tapi ngerana la nggit talu, ia tempa si beluhna. Gelah menang bas cakap, rugi pé ia nggit.

Babahna bagi bulan erlajar

Ngataken tempas babah mejile.

Petémbal bagi persepah babi

Ngandingken perukuren la des, entah pé silawanen. Umpamana, orang tua merincuh maka anakna mengketi sekolah guru. Até anak, kujapa pé labo dalih, gelah ula kusekolah guru.

La ngidah ikur babi pé

Adi nai, babi pulah pulah tengah kuta. Ikataken kempak kalak si tutus kal aténa erdahin. Pagi-pagi lampas kujuma, ikur babi pé lenga teridah. Karaben pé kenca gelap maka kurumah, ikur babi la nai ka teridah.

Bagi babi lau baleng

Babi lau baleng tersena galang janah mbur. Ikataken kempak jelma si seh burna.

Lain-lain babah nina babi

Kerna nanam entabeh la seri man tiap jelma. Siakap entabeh, lenga tentu entabeh akap jelma sideban.

Bagi si njarumi baju, icaingi muat jiléna.

Dagangen ijampuli lebé maka ijadiken pakén. Enda biasa iandingken ibas runggun. Radu-radu ncidahken ukur, mawen-mawen sisimbaken, gelah dat kesimpulen si mehuli.

Man anakna bagi bado.

Ikuanken man kalak si ngkuruk juak-juak entah pé pengikutna guna pejoré bana.

Bagi baling-baling, ija nari angin rembus kujé alakenna.

Iandingken kukalak si la tetap rukur. Apai si mbelinna kuasana ikapitina. Rimbang ras temanna la akapna dalih adi nguntungkenlah man bana.

Erdiré-diré iluhna bagi buah banban siteruk-teruken.

Ikataken kukalak si perah perngandungna, la erpeltep iluhna mambur.

Biring-biring banban

Batang ban-ban mbiring, tapi melinang. Ikataken kempak kalak si biring rupana, tapi ngena ate perbahanenna.

Bagi si ngelulus bangkar.

Pendahin si sia-sia.adi bangkar enggo me kerah, i lulus pe muat mesengna. Biasa ipaké kuajar si lanai erguna, erkitéken si man ajaren enggo melawenca iberé pengajaren.

Bagi baning, setahun nangken-nangken sada wari ngincuah.

Baning serbagé lébo, inganna bas kerangen. Erdalan la pedas. Sada-sada penangkengen ndekah ia ndalanisa. Tapi adi perlu akapna guna ngkawali daging, igulangna bana. Erdélang me ia kusuah.

Andingenna, lagu mehuli mahan até kalak jadi, ndekah erbanca. Tapi adi la metenget, lagu si ertahun nuance é lasam.

Banté biang, mereng.

Ido si mesera ngalokenca, perbahan akap peridon utangna é enggo utang si séa - séa.

Bante juljulen, ndapeti ergana.

Banté juljulen émkap jukut si ijuljul – juljulken naring man kalak si déban, sabab bengkau é la nai keri. Asakai até si nukur ergana asé, ndigan pé igalarina labo dalih. Enda biasa bas pantemen terpaksa, umpama kerbo megulang. Biasa iandingken kujelma si la nai siat ibas jabu (singuda-nguda si enggo erbap, gelah anak enggo ermerga. Emas unjuken la nai man perseréwaten. Biasa ijuljulken kalimbubu kuanak beruna.

Adi la bagé labo keri barang itiga.

Barang si kutera pé itiga lit nge si nukursa. Tiap barang, mehuli entah lahang, lit kalak si merlukenca. Biasa iantusken kempak si medanak, ngatakenca kerina jelma lako. Bicara mejin pé sekali rupa, entah lagu kurang, lit ka nge kalak si rate ngena.

Tumburen bareh.

Sitik saja bareh tertumbur, minter mesui. Ikataken man kalak si mesunah ukurna sigel. Sitik ibahan céda man bana, minter ia mengil-ngil, meruntus.

Dengut – dengut bagi bareh pepulung nanah.

Iandingken kempak peratén si mesui, ukur rembek-embek ibas sada-sada tangkelen.

Bagi persumpamana baro si mbelin.

kiam kulubang kena perjukjuk, adi kolu-kolu kena bubu, kahé-kahé kena tuar, kuaras kena pertenggil, kunamo kena tempuling.

Isumpamaken kukecibalen kalak si kutera pé la nai ngena. Uitken reh beratna, kuskasken reh serbutna.

Labo terambuti buah basbas.

Buah basbas melinang janah medalit. Bicara ijarati pé minter nge ndabuh. Ikataken kukalak si pantas, kerna kai pé la ia terakali, ia tertipu.

Bagi si ngongar batang kayu buruk.

Kerna sada-sada tangkelen si serbut. Isingetken pé man teman erbanca até morah ngenca, labo kenan sampaten. Adi ierem-erem saja pé ibas ukur, ngalah ngukurisa.

Maciri ingan kundul.

Ikataken man kalak si erbahan cinacat kempak ingannna ernalem. Umpamana kalak kesilang. Kenca isilangina jabu kalak piga-piga wari, ikilepkenna ka barang inganna kesilang é, seh erkitéken si é ia ipelawes.

Bagi si jujung batu.

Iandingken kempak baban nggeluh si mesera, lalap la lit si menahangna.

Bagi batu, kitik entah galang gia lau lalap nge ia iteruh.

Kerna kinigeluhen si mberat. Kumalih pé jaman, baban nggeluh la reh nahangna.

Bagi batu mombak, lalap la lumut-lumuten.

Iandingken kukalak si lalap la erduit, aminna gia enggo puas encari janah erpasangen mbelin.

Bagi si ngurkur batu gingging.

Bancin mawen-mawen batu gingging beka asangken nangtang ibas inganna nari.

Ngalaken batu-keling.

Mekatep ibelasken kalak si talu erjudi, janah isambarina inganna kundul. Akapna perbahan pengalana ku batu-keling (sada ingan bas désa si waluh) maka ia talu.

La pedah adangken, adi bedil terbuluh, timahna terbatu

Adi kugapa pé labo kalak mbiar, janah kita pé labo kalak mersik, la pedah pehantu-hantuken.

Taban beganding.

Bas perang si adi, kalak si nitaban musuh banci itebusi. Tapi pernah jelma tabanen kalak Beganding, kenca itebusi kalak, si nitaban é ipiserkenna ka terdauhen. Antusenna, si aturenna reh deherna jadi reh dauhna. Umpama kalak lajang. Nina, perbahan lit utangna janah tambang mulih la lit maka ia la banci reh. Kenca itengesken duit man bana, berita si kutera pé la nai lit ialoken. Entah enggo ia lawes terdauhen, entah enggo ia empo bas taneh perlajangen isé pé la meteh.

Pinter bagi belembang kupantar, séa katan keltungna.

Ikataken kempak kalak si ngaku ia bujur, tapi lit ieteh kalak kelépakenna si la ia nggit ncidahkenca.

Si maba-maba pinterna bagi belembang kupantar.

Iandingken kempak perkara entah pé perjengilen. Peképar ngakapsa maka ia bujur, peképar ngakapsa imbangna lépak.

Bagi belkih.

Iandingken kempak kalak si kujapa pé pedas.

Bagi Tanduk Belkih

Melala tupangna, tapi sukah penggelna, la megegeh. Biasana ikataken man kalak si mehantu akapna bana tapi lalit kinijagonna.

Bagi belo kadok, tapel la tertapel, anjungken la teranjungken.

Belo kadok la lit urat-tagangna. Bicara niiket pé batangna ku batang kayu, labo ia banci nggapa nangkih. Iandingken kempak jelma si la banci joré kutera pé penampati entahpé pengangkat-ngangkat.

Bagi belobo juma terulang..

Enggo dung peranin, lit denga déba belobo pajek tengah huma. Gunana la lit, sabab page la nai lit man buron. Iandingken man kalak si gelarna meganjang denga, tapi kuasana la nai lit. umpamana raja si nai. Genduari pé I sebut denga nge ia sultan, datuk, sibajak ras si débanna, tapi kuasana la nai lit.

Ngguru kubeltek.

Ikataken man kalak si kapé la tangkelenna lain beltekna. Pangan entabeh ras pangan mbué ngenca tangkelenna nggeluh.

Bagi belugun ku suka,la ersimulih.

Piring – piring ku suka, la ersimulih.

Suka la merdang-merdem, nimpa-nimpa bunga benih pé lahang. Emaka belugun si nibaba kalak suka nupung kerja tahun ikuta kalak nari, la ersimulih, sabap bas kutana la lit ibahan kerja si bagé. Iandingken kempak perbahanen entah lagu mehuli si la ersimulih.

Bagi belut.

Ikataken kempak kalak si pantas, la terakali.

Ngembahken benang penjarumi.

Ikataken man kalak si pehuliken. Lit kalak rubati la kisat ia ndamekenca, seh arih kalak é ersada mulihi.

Bagi si ngasuhi bengkala, kita ngasuhisa, kita uncimina.

Ikataken kempak anak si gutul. Kita pebelin-pebelinca, mekatep itotona atéta segat.

Bengkala biring gurung.

Lit sada macam bengkala mesera ngajarsa, mbiring rupa gurungna. Ikataken. Kempak jelma si la terajarken. Kutera pé ajar la bengket kupusuh peraténna.

Bagi bengkik terangen, la nai tertepetsa inganna.

Ikataken man kalak si terpapak-papak perbahan sada-sada sabap. Umpamana kadé-kadéna pé la nai itandaina, erkitéken dekahna nadingken kuta.

Erturin-turin bagi sinabah bengkuang.

Nabah bengkuang erturi-turin, la banci asal itabahi saja sabap mbué durina. Iandingken kempak runggun entah dahin si erlayas pengeranaken / pendahi seh dung.

Labo terpesirang beras ras lau.

Antusenna, perkadé-kadén labo banci masap, bicara kuga gia sekali perubaten ibas jabu.

Bagi berang-berang perubati ulih.

Lenga rulih erteman denga, taren rubat bunuh kalak.

Reh kerugin perbahan perubati asil pendahin. Umpamana pinangko si pembagin asil tinangkona jadi perjengilenna. Perbahan é rusia talang, janah tertangkap.

Bagi biang ras kucing.

Ikataken kukalak si la banci meriah. Jumpa kenca rubat, jumpa kenca rubat, jumpa kenca rubat.

Bagi biang Pa Tandingen, kapit linggarung.

Nina beritana, sekali sangana erburu, idapeti Pa Tandingen biangna kikutu ras linggarung si man burunna. Ikataken man kalak si kapit musuh, penghianat.

Bagi biang, sanga man rubati.

Ikataken man danak-danak si rubati sangana man.

Lit bisa lit nawar.

Antusenna, kuné lit si ncédaken, lit kang si pehuliken ngimbangisa.

Ikeléweti bagi si nabah batang buah.

Iandingken kempak perukuren entah rencana simuri. Arah apai pé ikelihi, pé itaktaki ku si kitik-kitikna. Labo kiniulin ras keuntungenna ngenca niidah, tapi pé kecédan ras kerugin ijamahi.

Bagi bulan belah purnama raya.

Ngataken rupa diberu megersing mejile

Ncidahken bana bagi bunga rinté lau makam.

Ikataken man kalak si mbiar rusur la itandai kalak. Umpamana sesekalak si la kin até itenahken kusada dahin. Reh ka ia, kus kas ia ijé, tempa ia penting bas dahin é.

Bagi cakcaken babo bungki

Akapna ia si meganjangna

Neldui bagi si erbengkuken cih.

Ikataken man kalak si nirup-nirup imenna

Ciké séa bajun, cingki séa baling – baling.

Ngataken talu.

Erbunga sia bagi perbunga cimen.

Andingenna, la gelgel pendahin manusia rasil. Mawen rasil, lit ka masana lahang.

Bagi cining bas ayo, la terbuni – buniken.

Ngataken rusia entah cinacat sesekalak la nai terbuniken enggo mbar.

Congah cider.

Ikataken man kalak si la nai erturin perigat janah perjabir gonjéna

Dari Berbagai Sumber

Share: