PEMENAN
Uga maka ikataken “nina si gundari?” Sigundari sikataken erkiteken
kerja tahun enggo menda i dalanken nai-nai nari (labo tangkas nari
ndiganai kin ibenaken), seh ngasa gundari. Janah nggit mawen dingen tuhu
nge maka pendalanken kerja tahun si adi ras gundari lanai bo seri.
Gelarna kerja tahun tapi pendalanken enggo pelain-lain; ikut pe
perbahan kemajun pemeteh rikut ras bengketna kiniteken-kiniteken
(Katolik, Protestan, Islam), maba perobahen nangdangi kerja tahun.
Penenakenna pe mawen-mawen enggo me erbage-bage. Deba gelah meriah man
anak kuta terlebih man singuda-nguda anak perana, deba gelah persadaan
nggeluh reh rembakna ras kade-kade, deba bage kin semalna teptep tahun.
Emaka ercakap kerna kerja tahun, e’ banci nge ncakapken si la
erkeri-kerin: “kerja tahun sekalenda lain ka ras kerja tahun si nderbih,
kerja tahun kuta si sada ah, lain ka ras kerja tahun kuta sidebanen,
wari kerja tahun ipemaju ntah ipemundur, ras si debanna” Dage sigendeki
cakapta kerna kerja tahun sicakapken kerja tahun nina kiniteken.
KERJA TAHUN SUE KINITEKEN SI ADI
Ikataken kerna si adi i tujuken ku kalak Karo sope bengket agama-agama
si darat (katolik, protestan, islam). Si adi ninta i jenda e me agama si
pemena. Alu merambo-rambo, erkiteken labo enda i siksik seh ku bena
banana, dingen labo lit tanda si banci kal jadi gelemen guna petetap
tuhunam seakatan turi-turin, internet ntah sada dua kitap, sicubaken
pepayo kerja tahun ndai.
Kerja tahun man jelma si adi, e me sada
wari si ipehagaken dingen si ergaken labo nghamati ‘dibata’ (dibata
sikataken e me dibata-dibata si ngiani, si ngerajai ingan, barang-barang
si tertentu). Ibas kerja tahun, dibata si ipehaga e me dibata si ngiani
taneh (beraspati taneh), ras dibata si nusur arah page si igelari Beru
Dayang.
E maka tupung lawes ku juma merdang, ntah tupung ‘mere
man page’ ilebuh me dibata si ngiani taneh Beraspati taneh bagepe
dibata singiani page Beru Dayang, alu sudipna. Bage kange tupung mutik
ntah rani. Kenca dung si enda maka iperiahken ibas wari mata kerja
tahun, man-man dingen njumpai ku rumah-rumah kade kade, ras adi lit
guro-guro aron/gendang aron.
Kai tujunna erbahan wari kerja
tahun emkap lako ngataken bujur man dibata, dingen mindo pasu-pasu ras
pengarak-ngarakna. Ngataken bujur perbahan page enggo seh i rumah, ntah
pe enggo dung nuan dingen torah mehumur. Mindo pasu-pasu gelah page si
enggo seh i rumah banci jadi man nakan kegeluhen ras pe pegedang-gedang
anak. Mindo pengarak-ngarak gelah geluh tetap bas kejuah-juahen dingen
page si nisuan banci torah mehumur dingen erbuah meramis seh ka ku wari
rani pagin.
Tujun si deban emkap lako perembakken dingen peteguhi
perkade-kaden sue ras adat nggeluh kalak Karo (janah ibas adat enda pe
teridah nge penghamaten man dibata arah kalimbubu). Tujun si debanna e
me kap dalam jumpa singuda-nguda anak perana sanga nutu cimpa ntah
erbahan rires. Bage kape tupung landek bas gendang aron. Rikut ku paksa
wari page maka ikataken me kerja tahun merdang merdem (mena nuan page);
kerja tahun nimpa bunga benih (page nangdangi beltek); mahpah (mutikken
page tanda nangdangi peranin); ngerires (page enggo dung i perani).
Teptep wari-wari kerja tahun si ibahan, e maka sue ras kiniteken si adi,
ibahan me aturen ras toto-totona (tabas). Lit nge toto lako merdang,
mere page, mutik page ntahpe rani page.
Umpamana mutik page:
Maka sope denga kerja tahun mahpah seh, ibahan me lakon mutikken page.
Bapa ras nande jabu, lawes duana ku juma maba ‘sumpit’ ras ‘belo kuh’.
Seh i juma ibuatna sumpit, i pengangana jenari iamparken deher ingan
“pemenan” (pemenan page, e me ingan si ibahan lako menai nuan page, i je
me pemenana bapa nuan page maka banci i enahken kutengah juma). E maka i
awin bapa me page si megersing si ngala kempak pemenan dingen ersudip,
“O Beru Dayang perinte-rinte, enggo kuidah kam mberu kal dingen
megersing. Enda kuputikken kal kam, kubaba me kam sendah ku sapo, gelah
pepagin seh paksana erguna pagi i suan kami, jadi kerja kerja si mehuli
ras pebelin-belin anak ni pupus” (Pdt. Dr. E.P. Ginting, Religi Karo,
hal 179).
E maka i putikkenna 5 ntah 6 ruhi page sin gala ku
bas ‘pemenan’. Seh i rumah i buatna 11 ngkebuah page ndai, isigena alu
tanna, berasna i pesada ku beras sada gantang. Page si lima ntah enem
ruhi ndai i tama ku babo para ntah isilepken ku ingan si mehuli seh i
buatna ka pagi man benih tupung merdang si reh.
Enda me sada bagin
toto/tabas si ibahan ibas wari kerja tahun ntah pe nangdangi kerja
tahun. Sabab kenca enggo dung wari mutik, maka seh me wari rani. Ras
wari kerja tahun, ngataken bujur man dibata.
KERJA TAHUN SI GUNDARI
Ngataken tangkas terang kuga kin kerja tahun si gundari labo melukah,
janah banci pe labo lit si tetapna. Maka kata si gundari si nikataken i
jenda e me kerja tahun si ilakoken kenca bengket agama-agama darat nari
(Katolik, Protestat, Islam, Hindu).
Kai banci sikataken e me kap,
maka kerja tahun si genduari, toto-toto, ntah lakon-lakon merdang, mere
page, mutik page, ntah pe rani, lanai idalanken perbahan siakap lanai
sembaba ras kiniteken sigundari ras kiniteken sigundari ndai.
Kerja
tahun ibahan banci jadi e’ erkiteken enggo sada kesemalen nggeluh kalak
Karo, janah mehuli iakap idalanken perbahan lit gunana. Gia lanai
teridah bagi guna kiniteken si adi, tapi guna lako nambahi persadan ras
perembakken perkade-kaden, bage ka pe erbahan anak perana singuda-nguda
sitedehen dingen banci ermeriah ukur (semalna lit guro-guro aron) maka
tetap idalanken.
Ngukuri Terbagesen
1. Si pepayo maka
kerja tahun idalanken jelma Karo si adi, perbahan lit persadanna ras
‘page’. Page si isuan, page si pesai, page si iperani. Enggaki maka
page, perbahan page nge iakap dalan kegeluhen. Kenca nini-nininta si
arah lebe nggeluh lanai bagi kalak pepulung buah-buah kayu, dingen
pindah i sada ingan nari ku ingan sideban, maka ia tading ibas sada
ingan (kuta) janah erlajar ‘nuan-nuan’. Sinuan si pematang eme page
geleah banci jadi nakan nggeluh.
2. Perbahan page nge iakap
dalan pegedang-gedang geluh maka nggeluh me kinieken nangdangi page e. I
teki maka page e i pesusur dibata i datas nari man banta. Erkiteken si e
gelah ula ia nembeh dingen megelut, i persentabi ia iurus, ibahan kuga
maka akapna tengteng seh pe ibahan lakon-lakonna bagi si ni iteki
dingen asa beluhna (merdang, mere page, mutik, rani ras sidebanna).
3. Si gundari lanai bo kal page sinuan-sinuan si iakap jadi
pegedang-gedang geluh. Banci nge itukur saja beras, banci nge ernakanken
roti. Nggit maka adi page i penalem jadi pegedang-gedang geluh, banci
jadi anak-anak pe lanai tersekolahken.
4. Bage ka pe adi
idalani ku kuta sada seh ku kuta sideban, menam-menam page lanai i suan.
Bicara lit pe sinuanken page, enterem kang lanai nuan page.
5.
Adi si idah perbahanen si adi kerna page ras kerja tahun, jahan seh
kita ku si gundari, maka nungkun-nungkung ukurta, kai nge dage “bena
gegeh” ibas erbahan kerja tahun sigundari (adi page lanai bo kal I
pehagaken bagi si adi)?
DALAN-DALAN RUKUR
Amin gia
lanai ernalemken sinuan-sinuan page, ntah kin banci nge si pakeken wari
kerja tahun tetap wari ngataken bujur ras wari mindo pasu-pasu ras gegeh
man Dibata? Sipakeken jadi wari TOTO.
PENDUNGI
Kerja
tahun sada kesemalen nggeluh idur kalak Karo si seh kal ulina.
Sura-suranta gelah min kerja tahun e reh warina reh teguhna dingen
tambah tunggunggna man kegeluhen erkade-kade terlebih man geluh
kiniteken. Amin lanai gia erkiteken peranin page dalan ngataken bujur,
tapi banci nge sibahan lakon ras-ras ngataken bujur man Dibata, ntah
erkiteken enggo dung wari ujian anak sekolah, ntah menai wari sekolah
tahun si mbaru. Entah pe lit si debanna. Mari si ukuri….bujur (P.
Albinus Ginting, OFM.Cap).
Team IRFA FM mendapat kabar bahwa erupsi gunung sinabung yang terjadi pada hari Kamis, 14 November 2013 selain menyemburkan debu vulkanik dan krikil sebesar biji jagung, juga mendapatkan kabar bahwa gunung sinabung memuntahkan batu sebesar ukuran rumah.
