ROSARIO ( Betlehem Ketaren )

Genduari enda i kutanta enterem kal jelma make rosario. Ibas kerja-kerja lit si ngelai erbura rosario, lit si ngalo-ngalo ertudung ras erkebaya janah ndarat ka banna bura rosariona. Tupung tiga bunga i jambur pe, sanga pernanden suksuk ndayaken bungana, la kurang bue banci iidah rosario molah-olah ikerahungna, tah kin ia sekalak Katolik tah Islam tah pe la enggo ku gereja, asal mulih tah berkat ku Namo Pencawir enggo erluahken rosario! Tuhu ibas sada dampar megah siakap erkiteken melala "bendera" katolik iembas-embasken, tapi ibas dampar si deban aru ateta sabap rosario labo bendera. 

Ibas teptep pesta paroki ilakoken pe, enterem jelma subuk si kundul ibas amak si nikimbangken bage pe si paksana rulung-ulung i toko paroki ibas kerahungna tambat bura rosario. Bura Rosario lit dingen molah-olah ibas tep-tep rumahta janah bura e ka si man daramen rombongan prajurit si reh ku paroki-paroki muat berkatna perang, ndalanken tugas ku Aceh ndube, sekali nari ntah kai kin gia agama ras ntah uga kin gia kinitekenna, la soal. Tapi tupung iban toto rosario i lingkungen tah i stasi, nterem ka mindo gelah isilahken saja gelah ula ikut ertoto Sintabi Maria!

Si nituriken idatas ngataken kata maka nterem denga si nandai rosario selaku bura si asal ipake niakap banci maba pasu-pasu, nelamatken tah pe si ngkelini, asal ipake niakap nilah kerina si ilat, maka erkiteken si e perlu denga kita pebagesi penggermeten kerna rosario selaku pertoton (devosi), dingen ngusahakensa jadi pertoton si sikap ban banta.

Bena-bena Sejarah Toto Rosario

Toto Rosario ibas bena-benana tubuh ibas kegeluhen i biara-biara pertapan, si ija lit kesemalen notoken 150 masmur dingen pertapa-pertapa si la meteh surat nggancihken notoken masmur e alu notoken 150 kali Pater Noster (Bapa Kami), ras gelah meteh piga Bapa Kami si enggo itotoken ibanna me cike erpudun-pudun tah pe tinali si ermanik-manik.

Ibas perkembangen sejarah, tubuh ka me toto Sintabi Maria (ibas bentuk si lenga bali ras si lit genduari). Igancihken me nototoken Bapa Kami alu nototoken Sintabi Maria si man pertapa si la pentar notoken masmur (la meteh surat). Kenca masmur ibelat ku telu terpuk, 150 Sintabi Maria pe ibelat ka ku telu terpuk alu 50 Sintabi Maria tep-tep terpukna.

Mulai abad XII pengulangen-pengulangen Sintabi Maria itujuken lako nginget rusia Keriaen Santa Maria, e me: Berita Keriahen, Ketubuhen Jesus, Kekeken Jesus ras Maria Niangkat ku Surga.  Ibas abad XIV kesemalen nimbang-nimbang 15 kejadin (3 rusia) kegeluhen Nande Maria ras Jesus enggo termurmur beritana ibas kegeluhen Gereja terlebih-lebih erkiteken pendahin St. Dominilus ras si ngikutken ia. Toto Rosario alu 3 rusia e isusun i Spanyol kira-kira tahun 1488 dingen itabalken Paus Pius V, ras dungna itetapken jadi pertoton si tabal (sah) ibas bulan Oktober 2002 alu Surat Apostolik  Rosarium Virginis Marie ibas tan Beato Johannes Paulus II. 

Beato e pe nehken 1 rusia si mbaru e me Rusia Terang lako peringet-ingeten kempak Peridin Jesus I Lau Jordan, Jesus Nangkasken diriNa ibas Kerja Erdemubayu i Kana, Jesus Nangkasken Kinirajan Dibata ras Nuruh Lako Jera, ras Jesus Nteridahken KemulianNa i datas Deleng dingen netapken Ekaristi.  Erkiteken usulen Beato Johannes Paulus II genduari ibas kita enggo lit 4 rusia ras 20 kejadin si man timbang-timbangen janah enggo banci ilakoken ibas pertoton rosarionta.

Bena-bena Sejarah Bulan Oktober Bulan Rosario

Tep-tep tanggal 7 Oktober Gereja ngerayaken Kerja (pesta) Maria Ratu Rosario. Penetapen tanggal e nginget-nginget kemenangen tentera-tentera Kristen si kurang teremna ngelawan tentera-tentera Turki (Islam) si nterem ibas Perang Lepanto ibas wari Minggu Tanggal 7 Oktober 1571 ija sope perang ibenaken paus Pius V (1566-1572) nuruh kerina umat mindo pengepkepen Nande Maria guna Gereja arah ertoto rosario.

Paus klemens IX (1667-1669) ngukuhken pesta e selaku pesta Gereja se-dunia dingen paus Leo XIII (1878-1903) netapken segedang-gtedang bulan Oktober selaku bulan rosario lako ngamati Nande Maria. Paus Leo ngkuhi pengantusen kerna ertoto rosario labo lako nginget kemenangen ibas Perang Lepanto saja tapi terlebih guna ngamati Nande Maria: si jadi “rumah” lako pendahin pengkelini Dibata ibas Jesus Kristus, kiniulin Maria si tetap maler ras nusur nggemgemi Gereja (ras man banta sekalak-sekalak) dingen pengarak-ngarak Maria kempak kalak si erpengendes ibas kiniteken segedang-gedang paksa.

Erlajar Ngergaken Toto Rosario

(a)    Erlajar Arah Semangat Malekat Jibril

Ibas turi-turin sinuria  ibas perpulungen ikataken maka lanai tole mesekah niakap malekat Jibril rikutken debet-debet  pusuhna tupung ia isuruh arus njumpai sekalak singuda-nguda si tergelar Maria si tading i kuta Nasaret. Biar-biaren ia piah litap kerina batang dagingna ibalik kabengna, labo erkitekenndahi Maria ia mbenaken dahin lako nehken berita, tapi erkiteken keriahen ukur Maria lako ngueken pemindon Dibata si nibabana ietehna alu tangkas ugape maba kesalihen man kegeluhen manusia sirulo.  Apaika tupung Maria nungkuni maleka Jibril kerna engkai maka Dibata milih ia ras penungkunen-penungkunen sideban, tuhu-tuhu erbahan malekat Jibril debet-debet tah kin Maria la senang lako ndalanken sura-sura Dibata. Ertina, kininggiten Maria ngueken sura-sura Dibata e, labo kejadin si biasa-biasa saja, tapi kejadin si perlu iergaken terlebih-lebih ibas ngergaken nandeta Maria si erkiteken pengendesen dirina me sialoken kesenangen rikutken keselamaten.

(b) Erlajar arah kesemalen Dominikan

St. Dominikus (1170-1221) si pepantek Ordo Pewarta ibas ngikut-ngikut semangat Malekat Jibril ngajarken maka  Toto Rosario  metunggung igeluhken arah kesemalen pebagesken pengukuri kerna kejadin-kejadin si pepantek keselamaten manusia erkelangken ketunggungen kiniteken Maria.  Toto Rosario man Ordo Dominikan jadi toto si la banci lang itotoken tep-tep wari, igejapkenna jadi pergegeh ibas ndalanken tegunna selaku ”malekat Jibril” man kerina jelma janah berita sinisehken Jibril e igelemna selako kotbah si seh kal serta ras badiana dingen  jadi tanda-tanda Tuhan jadi sekawalna.

Ibas pendahin Dominikan, la banci lang arus katawari paksa pe sikap niutus lako berkat, gia ntah kuja dingen gia pindah-pindah kujah-kuje ibas sada ingan ku ingan sideban maka la banci lang arus ngadepi erbage-bage kiniseran ras perbeben-perbeben kegeluhen pendahinna tapi Toto Rosario igejabkenna jadi gegeh si mpersadaken rarasenna ibas semangat malekat dingen mabai dirina  sekalak-sekalak alu antusen kegeluhen selaku perdalinen ndahi Bapa, dingen ipegegehi arah kekelengen Tuhan bagi si enggo dingen  tetap inanami manusia si erpengendes ibas kiniteken si metunggung.

(c) Erlajar Arah Penggermeten ku Kegeluhen si tep-tep Wari

Banci jadi reh  ninta banta ntah pe man simegiken kita, la banci lang  ngulih-ngulihi sada pertoton si bagi Toto Rosario alu erpuluh-puluh kali erbahan kita medu, apaika tupung simedakken matanta labo lit si angkas ilebe-lebe matanta si salih bagi si enggona. Tuhu, adi kita pebelinken dampar perukuren ras pengantusen saja, maka melukah kita ndabuh ku kemedun ntah kempak kai-kai saja pe.  Arah pebelinken dampar keperlun pusuh kempak kekelengen, si tuhuna kita la pernah bosan adi nikataken temanta, umpamana: ”makarongku, abang sayangku, kekelengenku”, ras si debanna, tapi  erkiteken si e me maka singataken kata bage pe si megikensa lit ibas penggejapen sada kekelengen.  Ntah pe la lit temanta si medu adi sikataken arah pusuhta nari, umpamana: ”kam ateku jadi, kam tambaten pusuhku, kam ateku keleng” ras si debanna, tapi ma kin erkiteken si e me maka kerembaken dirinta ras si jadi ingan kata e pe jadi teriket ibas kekelengen.  Lang kin gia, ma kin ibas kegeluhen si tep-tep wari labo lit jelma si medu gia arus meribu-ribu kali man, minem, ngeranta-ngerana tunduh tah pe maun sinik saja, sabap ma kin em bagin kegeluhen. Ma bage kin?!

Betlehem Ketaren, SH. Arah erbage-bage sumbul nari.

Salam : Kesain Rumah Derpih

Share: