Kupersoken Kam Nande

31 maret 82, i je me wari ketubuhen ku. Beru sikubaba eme br ginting, aku anak si peduaken, sintua dilaki, janah ibas umurku 2 tahun, bapa enggo lawes nadingken kami. Kami tading i sada kuta si ndauh arah perkotan nari. Kenca bapa lawes, aku i baba nande ku sada kuta si ndauh arah ingan kami tading gel gel. Bage me penuri nuri nande kerna aku mulai kitik kitik nari, seh umurku gundari 30 tahun, janah turang ku si ntua nggo erjabu janah tading i kota medan. Situhuna megogo kel ateku adi kuturiken kerna perdalanen geluh ku, tapi adi la ku turiken, mbiar aku lalap la banci terlupaken aku kenangen enda. Cerita enda terjadi tupung aku sekolah denga. Kenca mulih sekolah nari, bagi sibiasana, aku minter mulih ku rumah gelah banci nampati nande ku juma. Seh kenca aku i rumah, ku dapeti nande sangana ngerana ngerana ras sada keluarga sideban si la kutandai. Kutatap ayo nande, bagi si lit kuakap perbeben ibas ia. Amin bage gia, labo mis ku sungkun, tapi pinter aku ku kamar janah ganti ose. Perban jam pe nggo ciger, janah aku pe nggo melihe, emaka ku sungkun nande “ Enggo Man kam nande? Ningku janah ku pinter ku dapur. “ Enggo nak ku...man ken to “ Ope denga man, perban kuidah ndai lit temue nande, emaka ku iyahken ka ia man. “ Mari man kita lebe bi.”...ningku janah njaka piring. “ Ue nak ku yah...” nina alu senyum. Adi ku perdiateken, mehuli kel temue nande e, tapi engkai maka kutatap ayo nande bagi si lit kuakap perbeben ras iya ?? nina ukurku janah sekali sekali ku dahup ka nakan radumken pucuk ropah si nggo kutama ku piring. La bagi biasana, kenca elah man minter aku nuci piring, tapi erkiteken lit temue nande, minter ka ku jumpai ku ruangen tengah. Asum aku kudul deher nande, temue nande e natap aku alu tatapen si mehuli, cirem ia ngenen aku, janah nungkun ia “ Kelas piga kam enggo nak ku “? “ Kelas 3 bi ”, ningku janah kundul, ku cikep tan nande si kawes. Kenca ndekah sitik I sungkunina aku kerna sekolah ku, emaka nina man nande. “ Enam ia gi, adi sura sura kami, katakenndu min man anakta ena, gelah ia pe pagi la akapna latih”. Megi ranan temue nande e, tersungkun ibas ukurku, aku nge kuakap si cakapken nande ras temuena e ndai nari, bage ateku. Janah minter ku sungkun. “ Kai kin si cakapken kena ndai bi ?” “ Labo kai pe nak ku, nande ndu kari nurikensa man bandu, nina janah I kuhina ka belona. “ Janahna ngkuhi belo, nina ka. “ Agi, bagem dage, kami pe labo banci ndekahsa I jenda, nggo melawen, lenga ka ndai buat perbapan enda nakan kambing na”. “ Ue ka yah…adi bage kin kari simehulina, me bage me siban “. Nina nande. Kuidah arah ayo nande, bagi si mberat akapna ngaloisa. “ Menggo dage, mulih kami, tutus atendu sekolah ya nakku “, nina janahna njingkangken nahena ku darat rumah. “ ue bi…anjar anjar kena “, ningku janah kuarakken ku labah. Kenca nggo berkat temue nande ndai, perban penasaren na aku, emaka kusungkun nande kai nge situhuna terjadi, maka sempat bagi si mberat kuakap perukuren nande. Tapi nina nande, labo perlu iturikenna man bangku, aku pe kueteh nge pagi kedungenna. Perban bage nina nande, aku pe labo nggit maksakensa gelah ituriken nande. Perban wari pe nggo nangdangi ben, emaka lanai kami ku juma ras nande, minter kuampeken nakan man kari berngi. Sanga aku erdakan e pe, lalap nge ku ukuri kerna percakapen nande ras temuena ndai, perban sie, la kuarap sanga aku ngires lasuna, tersayat tan ku, janah ku serko, I begi nande soraku minter I ayakina ku dapur, “ kena kai kam e nakku?” La terbelasken aku perban suina kuakap, janah idah nande tan ku enggo nircir darehna, emaka I puyuna bulung belo janah ikis kis na pantil belanga, emaka I dampelkenna ku tan ku si tersayat ndai. Janah nina. “ Emaka ula lolah adi erdakan… ntah kai kin siman ukurenndu pe?” Ningku ngaloi janah nahanke mesui “ Si kataken bibi ah ndai” Sinik nande, lalit kai pe jababna. Kenca dung I tambari nande nina “ enggo yah, anjar anjar saja, lo kai pe man ukuren “, nina janah tadingkenna aku I dapur. Ngidah perbahanen nande, tempa mberat kel perbeben si reh e. Jam pe terus nge erdalan janah la gejab wari pe nggo ndabuh ku gelapna, emaka man kami ras nande. Kenca elah man, minter aku kerjaken PR ku, janah nande mupui jaung gelah banci pagi I suanken. Jam dingding enggo nuduhken jam 10 berngi. “ Nggo melawen nande, pagi ka ena, tunduh kita yah… “ningku janah ku nusuni buku ku. “ Ue… sitik nari, leben kam tunduh “ nina nande janah usur usurna mupui jaung. Kenca ku pesikap kerina bukuku, janah ku eruk kerina pintun, emaka lawes aku ku kamar ku, ku amparken dagingku bas ingan medem, janah mulihi ka aku teringet kerna kata bibi ndai. “ Enam ia gi, adi sura sura kami, katakenndu min man anakta ena, gelah ia pe pagi la akapna latih”. “ Kai nge maksud bibi ah ndai? Nina ukurku. “ Ntah kin lit utangen nande bas ia?” “ Ntah kin kaka tua lit masalahna I tanah perlajangen?” “ Ntah kin lit anakna anak perana, janah I pejabuna kami?” “ ah… la mungkin, aku sekolah denga…” “ Tapi nina nande ndai “ aku pe kueteh nge pepagin.ah…..+ Seh terang wari pe, lenga bo kueteh kai siterjadi ibas keluarga kami, seh sekolah pe, permasalahen enda lalap ngikuti aku, erban aku la banci konsentrasi erlajar, nggo piga piga kali aku I kuitken temanku perban idahna aku terlolah lolah. Singkat cerita, ibas sada masa, ernipi aku, reh bapa ibas nipiku, amin la gia pernah kutandai ia, tapi tek aku maka ia kap si njumpai aku, perban bali kel ayona ras poto si cidahken nande man bangku kerna bapa. Nina bas nipiku “ Anakku, tedeh kel ateku kam…” Emaka ope denga berkat sekolah, kuturiken me nipiku man nade. “ Labo bage nakku, adi tedeh kin ate bapandu kam, taruhken ka bungana, lang pe nggo ka lit telu tahun la dahindu bapandu, kam saja kujah, aku 4 bulan silewat kang jah nari, sanga kerja bibi ngudandu”. “ Ue nande yah…wari minggu e kari me jiarah aku, ningku janah kupakeken sepatuku. La gejap seh ka menda wari minggu, kenca mulih gereja nari, emaka minter aku ersikap gelah lawes naruhken bunga ku kuburen bapa. “ Berkat dage aku ya nande…” ningku man nande, perban nggo sikap kerina siman baban. “ Ue… anjar anjar kam, singgah kam kari rumah bibi ngudandu, kataken bana, nande la kujenda nindu, egia, mejuah juah nge ia nindu. ula kari tersungkun ka ukurna.” “ Ue nande…” Kenca seh aku kuburen bapa, kuamburken bunga janah la kuarap mambur iluhku, Kenca mulih kuburen nari, ibas perdalanen, lit sekalak pernanden singarakken aku pudi nari si umurna mungkin tuan asangken nandeku, janah nina… “ O… nak ku…ja nari nge kam e ndai?” “ Kuburen bapa bi… jiarah.” “ Kam ja kin tading?” Emaka kuturiken me gelar kutaku. “ Siapai kin kuburen bapandu”? nina ka nungkun aku, perban sietehna, lalit anak kuta jenda si erjabu ku kuta ku sigundari. Emaka ku gelari me gelar bapa. Janah nina, “ O… e payo bibindu aku, aku beru ginting, erturang aku ras bapandu ah, egia me labo terudu kel kam mulih, ngerana ateku sentisik ras kam “ Penasaren aku, janah ningku “ Kai kin bi???” “ Rumah kari ku turiken, rumahta ndeher ras rumah bibi nguda ndu ah “ nina. La ndekahsa, seh me kami I rumah bibi ndai.  
BERSAMBUNG....

Share: