Deleng Kuta Gugung

Ituriken : Nini Riodes br Tarigan Tambak

I daerah deher Kuta Jurung, Deli Serdang, lit me sada perjuman gelarna Deleng Kuta Gugung. Duapuluh tahun si lewat, ope denga perjumaan e langa jadi perkebunen, adi gelari “gundur’ biasana minter reh udan. Emaka adi merdang kenca ibas daerah e, biasana enggo ipersingeti orang tua gelah adi mindo gulen ula gelari gundur,erkiteken adi merdang kebiasaan daerah e gulenna biasana gundur ras dantis (sarden). Adi gelari gundur ugape nusur udan, lanai banci ngerdangi juma, entah pe nuan page. Uga maka bage banci terjadi ? Kepeken lit turi-turinna si cukup populer daerah sekitar enda. Turi-turinna bagenda, bagi sini turiken Nini Tigan Riodes br Tarigan.

Hio.., nai ningen ibas sada kuta si kitik denga, lit me ije tading sekalak perbapan ras ndeharana, anakna dua kalak diberu. Sinuan-nuannna pe mbuah kerina rikut pe rubia-rubia ni asuh pe merih kerina. Babi, manuk, bagepe lembu na enggo pe mbue. Anak-anak pe sehat-sehat kerina. Namun bage gia lit denga si kurang akap bapa tengah jabu, erkiteken anak ni pupus langa lit dilaki. Amin seri nge penatapku kerina anak-anak e nina, tapi langa akapna kuh adi langa lit pupus dilaki. Kenca enggo mbages iukuri perbapan ndai, ibas sada berngi pesehna me sura-surana man ndeharana. “Sentabi kel aku man bandu, adi banci min ijin kenndu ka aku erjabu, gelah banci lit pupus ta dilaki.”. Kira-kira bagem isi pusuhna iturikenna man ndeharana. Tapi uga pe penurikenna, lalap sa senang ndeharana. Padahal enggo iturikenna maka labo pagi urak atena kelang nandangi ndeharana e. Tujunna hanya gelah ndatken anak dilaki saja. Emaka labo dalih man bana ras diberu siapai pe erjabu, termasuk diberu kawan. Enggo pe piga-piga kali pesehna man ndeharana, tapi lalap la senang ndeharana.

Ibas sada berngi, erkiteken enggo keri beras, emaka suruh perbapan ndai me ndeharana singuda nutu page ku lesung. Igum-gumna (bedong) anakna, tamakenna bas jole-jole. Erkiteken perasaan nembeh bas ndehara sintua ngutkut denga bagi api bas kedep, emaka dalankenna sura-surana si jahat. Ibuatna gundur, igum-gumna ka, emaka tamakenna kubas jole-jole ndai, dingen anak dilaki ndai ibabana ku pudi rumah. Bagi biasana berngi ndehara sintua erbahan lambuk babi, emaka erkiteken nembehna atena, ilambukkenna me anak di dilaki ndai.

Turah perasaan curiga ibas ndehara singuda ndai, engkai maka bage dekahna la tangis anakku ndai atena. Emaka nehenna me kubas jole-jole anak ndai, idahna denga je gum-gumen. Bukana gum-gum ndai, tapi enggo gundur ibas. Seh kel ia senggetna. Kuja nge ndia anakku ndai atena. Erkiteken enggo daramina tapi lalap la jumpa, serko ngandung me ia. Sengget pe perbulangenna. “Engkai maka kam ngandung?”, nina. Emaka iturikenna maka anakna lanai idahna, anakna enggo salih jadi gundur. Ibas berngi e pe idarami anak ndai ku ingan-ingan dideban, tapi lalap lanai teridah.

Lanai bo tertunduhken ndeharana singuda ndai ibas berngi e, erkiteken anakna ndai lalap ibas ukurna. Emaka enggo kenca terkuak manuk sipeduaken, ope langa ndarami anakna, berena lebe babina man. Iangkatna lambuk ndai, emaka tamana kubas pelangkah. Sanga tamana lambuk ndai ku pelangkah, babi pe la pet man. Engkai maka la pet man babi enda atena, emaka pernehenna lambuk ndai, enggo kepe ije teridah bites, tan, si enggo melumat kepeken itek-teki ndehara sintua. Erkiteken senggetna ndehara singuda ndai ngidah bage rupana, emaka sadar ia maka anakna ndai enggo kepe imutilasi. Emaka minter entamkennda daging kubas pelangkah ndai.

Tempaskenna bana kubas pelangkah ndai rikut ras atena ceda.
Bage tempaskenna dagingna ku pelangkah, rikut perkas pe erkilap sumagan. Pernanden ndai, bagepe pelangkah ras gera-gera babi si biasa ipakena sanga mbere babina man, rempet ngobah jadi batu. Ngidah sibagenda rupana, tuhu-tuhu kel perbapan ndai pe labuh ras sedih ukurna. Ia pe sadar engkai maka e banci terjadi, erkiteken la senang ndeharana erkidua. Kenca kejadin e, emaka ibas ingan e pelangkah e, bagepe takal anakna si enggo jadi batu, rikut pe ras ndeharana singuda enggo jadi batu, tetap la lit kalak si pang mindahkenca. Batu e she gundari banci denga inehen ibas daerah e. Amin gia gundari lanai lit ije kuta. Khusus ingan batu e, pernah ikeramatken kiniteken sindekah.

Menurut tua-tua sindekah, adi pindahken batu e kuteruh deleng e, pasti pindah ka mulihken ku datas. Bagepe adi diloken ‘gundur’ uga pe minter udan wari e, sebagai simbol kesedihen ndeharan sipeduaken nginget kejadin e. Bagepe menurut kebiasaan ibas daerah enda, adi enggo ergeruh Deleng Kuta Gugung, ugape biasana udan wari. Tradisi sibagenda rupana ndekah nggeluh idaerah enda.

(Julianus Limbeng)

Salam : Kesain Rumah Derpih

Share: